Автор: qazaqmet

  • Қауіпсіздікке қадам

    Биыл 28 сәуір – Дүниежүзілік еңбекті қорғау күні «Қазхром» компаниясында кең көлемде аталып өтті. Өнеркәсіп бөлімшелерінің цехішілік шаралары өз алдына, мектеп оқушыларына арналған «Қауіпсіздік – ол біз!» акциясы жоғары деңгейде ұйымдастырылды. Балалар назарын қауіпсіздікке бұрған шара Ақтөбе, Ақсу, Хромтау қалаларының үш мектебін қамтыды.

    Филиалдардың еңбекті қорғау және өнеркәсіптік қауіпсіздік бөлімінің мамандары мектеп оқушыларына барып, қауіпсіздік ережелерімен таныстырды. Оларды құтқарушы-батырлармен кездестіріп, экскурсия ұйымдастырды.

             Дөң тау-кен байыту комбинатының маманы №7 мектеп-интернатының бесінші сыныбына қауіпсіздік ережелерін түсіндіріп, өнеркәсіпте қауіпсіздік қатаң сақталатынын айта өтті. Себебі кейбір оқушылардың ата-аналары кәсіпорында еңбек етеді. Олар үшін бұл маңызды ақпарат. Оқушылар қауіпсіздік үйден басталатындығын бірден түсінгендей, тақырыпқа сай қойылған сұрақтарға жылдам жауап беріп, ойларын ортаға салды.

    Хромтау ауданы төтенше жағдайлар бөлімінің бас маманы Дамир Ахатов пен оның әріптесі, Хромтау ауданы № 20 өрт сөндіру бөлімі басшысының орынбасары, азаматтық қорғау капитаны Жасұлан Қажқайдар – акцияның басты қонақтары. Оқушылар өрт сөндірушілер мен құтқарушылардың кәсіби жұмыстары туралы қызықты әңігемелерге қанық болды.

    – Қауіпсіздік жас талғамайды. Жұмыста болсын, мектеп қабырғасында болсын, кез-келген жерде абайлап, сақ болу қажет. Қате аяқ асты. Мектептегі кезден қауіпсіздік ережелерін түсініп өссеңіздер, болашақта сіздер – үлкен жұмыс орныдарында алаңсыз, қауіпсіз еңбек үлгісін көрсетер мықты маманға айналасыздар. Өзіңізге ғана емес, қажет болған жағдайда өзгеге де көмектесе алатын боласыздар, — деді Дөң тау-кен байыту комбинаты еңбекті қорғау және өнеркәсіп қауіпсіздігі бөлімінің маманы Талғат Ұлмағамбетов.

    Содан соң оқушылар комбинаттың құтқару бекетіне саяхат жасады. Сегіз тонна су таситын алып көліктер, өрт сөндіруші киімі, ұзындығы 20 метрге жететін өрт сөндіру жеңдері, 14 келілік өзін-өзі құтқарғыш құралы – оқушыларды қызықтыра түсті. Осы жабдықтың барлығы – шахталар мен өндірістік алаңдарда өрт немесе өзге де құтқару жұмыстары шыққанда қолданылатынына тамсанды.

    – Менің әкем шахтада вагондармен кен тасиды. Әкем жұмыстан кешіксе алаңдаймын, ұйықтамай күтемін. Оның жұмысында қауіпсіздік ережелерінің маңызды екенін жақсы түсінемін. Бірақ мынандай арнайы топтың барын бірінші рет көріп тұрмын. Адамдарды құтқару үшін мұнда барлығы бар. Әйтсе де, қаупсіздік – өзімізден басталады, — деген бесінші сынып оқушысы Еркеназ Дулатқызы ақылдылығын көрсетті.

    Ақсу ферроқорытпа зауытының мамандары моноқаланың №8 мектебіне барды. Бұл кездесудің басты кейіпкері – зауыттың өртке қарсы қызметінің ардагері Әлім Умиров. Ардагер балақайларға өрт қауіпсіздігі ережелерін кеңінен түсіндіріп берді. Одан соң кішкентай тыңдаушылар қарауыл басшысы Қамбар Ахмедьяновтың жетекшілігімен Ақсу ферроқорытпа зауытының өрт сөндіру бөліміне саяхаттады. Ондағы жеке қорғаныс құралдары, құтқарушылар тобы, өрт сөндіру көліктері оқушыларды таңғалдырмай қоймады.

    Қалалық №26 мектебінде болған ақтөбелік әріптестер де оқушыларға қауіпсіздік туралы қызықты ашық сабақ өткізді. Сыныпқа үш бірдей ақтөбелік құтқарушылардың кіріп келуі – шараның ең қызықты жеріне айналды. Адам өмірін апаттардан арашалап жүрген батырлармен кездесуді оқушылар үшін тосын оқиға. Сала мамандары: Виктор Касавец, Рустам Жанкулов және Вадим Абельханов акция тақырыбына қатысты нұсқаулықтарды көрсетіп, мағыналы кездесуде пайдалы ақпараттар айтылды.

    – Біз құтқарған адамдардың 70%-ы балалар. Есіктері кілттеніп, абайсызда кәріз құдығына құлап, үйде өрт шығып, қатты ұйықтап кетіп, ата-аналарына есікті ашпай қалу секілді себептер көп, — деп құтқарушы Виктор Касавец 12 жылдық тәжірибесінен мысалдар келтірді. – Мұндай жағдайлар көптеп кездеседі. Сондықтан жауапты болыңдар.

    Ақтөбе ферроқорытпа зауытының еңбекті қорғау және өнеркәсіп қауіпсіздігі бөлімінің мамандары оқушыларды металлургтермен де кездесуге шақырды. Өндірістегі қызу тірлікті бұрын-соңды еш жерде көрмеген балақайлар басқа әлемге енгендей күй кешті.

    Қызметкерлер оларға зауыттың өрт сөндіру бөлімін және биіктікте жұмыс істеуге арналған алаңды көрсетті. Шара соңында металлургтермен кездесіп, олардың каскасын киіп көрді.

    Акция аясында оқушылар көп сұрақтар қойды. Шара соңында балалар құтқарушылардың жұмыс орындарында «Сені үйде күтеміз!» деген жазуы бар ерекше әсер берер жапсырмаларды естелікке қалдырды. Қоржындарын қауіпсіздік ережелеріне толтырған балақайлар  кейіпкерлермен естелік суретке түсіп, жұмыстарына амандық тілеп, балалық тілектерін жеткізді.

    Арайлым ҒАНИ

    Гульмира КУЛЬТАЕВА

    Елена ГОРДЕЕВА

  • Пеш жанында – ширек ғасыр

    Балқытушы Қайырзада Нәжімиденовтің күнделікті ізімен зауыт табалдырығын аттап жүргеніне 25 жыл болыпты.  ERG (Еуразиялық Топ) құрамындағы «Қазхром»ТҰК» АҚ филиалы – Ақсу ферроқорытпа зауытының төртінші балқыту пешінде еңбек кітапшаларын бір ғана жолмен толтырып келе жатқандар көп. Бірегей бөлімше өзінің өмірін қиын да қызықты металлургия саласына арнаған  жандарды назарынан тыс қалдырмай келеді. Осы жексенбіде Қайырзада  өзінің кәсіби мерекесін атап өтпек.

    Қайырзада Нәжімиденов қала маңындағы Грязновка ауылында туып өскен. Достарымен бірге №164 қалалық кәсіби-техникалық училишесін тәмамдаған. Зауыт қызметкерлерінің әйгілі ұстаханасы сол кезде-ақ жас жігіттердің таңдаған мамандығы — ферроқорытпаларды балқытуға деген сүйіспеншіліктірін арттырған еді. Бұл  ұстахана түлектерінің көпшілігі үшін өмірлерінің мәні болды. Әскери өмір жас ферроқорытпашыға әлемді  аз да болса көруге мүмкіндік берді. Қайырзада Нәжімиденов Польшадағы әскердің Солтүстік тобында Отан алдындағы борышын өтеген. Демобилизациядан кейін ол екі жыл бойы өз қызметкерін асыға күткен зауытқа қайта оралады.

    – Таңдауым бірден осы мамандыққа түсті, — деп еске алады №42 пештің бригадир көмекшісі Қайырзада. – Бес дос болып бастапқыда зауытқа келуді жоспарладық. Жұмысқа орналасудың басқа нұсқаларын ойламаппыз да. Сол уақыттың өзінде кәсіпорын дүркіреп тұрды. Металлург мамандығы балқытылған металдың әдемілігімен ғана емес, күш-жігер және мінездің беріктігімен сипатталатын ер азаматқа тән  ісімен қызықтырды. Қайсар рухты мамандық бүгінгі күнге дейін маңыздылығын жоғалтпай келеді. Мен өз таңдауыма ешқашан өкінген емеспін. Алдағы уақытта да мұнда жұмысымды жалғастырып, уақытымды зая кетірмейтініме сенімдімін.

    Кейіпкеріміз цехта өткен жылдарын күлімсірей еске алады. Ия, осы уақыт ішінде көптеген қызықты оқиғалар өтті. Төртінші цехтың зауытта қорытпалар, шикізат пен материалдардың жаңа түрлері сыналған полигон ретінде беделге ие болуы бекер емес. Бірақ басты байлық әрдайым адамдар болды және солай қала ермек. Олар – өз ісінің кәсіби мамандары.

    – Қазіргі жастарға қарап қуанасың, — дейді Қайырзада Нәжімиденов. – Олардың пеш жанында тұрақты түрде қалатыны немесе өздерін өзге ортада байқап көргісі келетіндері бірден көрініп тұрады. Цехта көптеген жақсы адамдар тәрбиеленді. Менің үрім-бұтағымның барлық дерлік өкілдері — өндірістік жұмысшылар мен тәлімгерлер. Біз бұл дәстүрді бұзбауға тырысамыз. Ізімізді жалғар лайықтыларды  да дайындап жатырмыз. Жігіттер бізге ақылды, алдарына айқын мақсаттары бар, бастамашыл болып келеді. Олар мамандықты, технологияны тереңінен білуге ​​және кәсіби маман болуға ұмтылады. Мұндай жастармен жұмыс істеу оңай. Олардың кез-келген жағдайда өздерін ұстай алатындарына қуаныштымын. Барлық адам бірдей емес. Өндірістің ыстық-суығына төтеп бере алулары керек.

    «Егер жақсы дүние жасағың келе ме – өзің істе». Бұл – Қайырзада Мәдениетұлының өмірлік ұстанымы. Шебер өзінің тұлғалық болмысымен хром мен кремний қорытпалары шығарылатын цех жастарына күнделікті жұмысының дұрыс әдістерін, технологиялық олқылықтарын көрсетіп-түсіндіріп, олардың еңбек ете білуін бақылап, өндірістік қауіпсіздік пен жұмыс орнындағы тәртіп және күн сайынғы болатын процестерді үйрете жүріп, тәлімгерлікте қажетті нәтижеге қол жеткізу оңай әрі тез болатынына сенімді.

    Қайырзада Нәжімиденов алда зейнеттік жылдардың да таяп қалғанын ойлап, болашақтағы жоспары туралы бір деммен ғана жауап берді.

    – Жұмысты ойламай, ұйқыңнан тұру қалай болатынын елестете алмаймын, — дейді бригадир көмекшісі. – Әйтсе де, зейнетте жүріп бір іс тауып аламын. Үй шаруасындағы жұбайым мен қыздарыма көмектессем де, қарап жатпаймын. Екі қызым да тұрмыста. Павлодарда тұрады. Кенжемізді өткен жылы ұзаттық. Ал үлкенім бізге екі жиен сыйлады. Қылықтары мен қызықтарын көріп келеміз. Олармен зейнеттік уақытта жиі көрісіп тұрамын деп ойлаймын. Бірақ, бұның барлығы бес жылдан кейін болатын нәрселер. Соған жеткізсің. Ал қазір аянбай еңбек етіп қалатын уақыт. Цехымыз жақсы, ынтымақта жүретін ұжымым бар. Ал зауыттың өзі бір төбе. Кәсіби шеберлік, мол өндірістік тәжірибе мен білім, жайдарлы мінез, табиғи қарапайымдылықтың бәрі  Қайырзада Нәжімиденовтің бір бойынан табылады. Әріптестері оны осы үшін де жоғары бағалайды және құрметтейді.

  • Қызметтеріне құрмет көрсетті

    «Қазхром» ТҰК» АҚ филиалы – Дөң тау-кен байыту комбинаты биыл екінші жыл қатарынан медицина қызметкерлерін кәсіби мерекелерімен құттықтап барды. Ақ халатты абзал жандардың екінші жыл қатарынан сын сағатта 24/7 режимінде жұмыс істеп жатқандарын шахтерлер мен металлургтер жақсы түсінеді. Себебі, ыстық пештер мен жерасты тірлігінде де тоқтау жоқ. Сол себепті жүктелген міндетті орындап, уақытында әрекет етіп, алғашқы көмек көрсететін медицина қызметкерлеріне кеншілер тарапынан тағы да «алғыс сөздер» жолданды. 

    Өткен көктемде басталып, әлі де жалғасып келе жатқан қиын сәтте қазхромдықтар қашан да көмекке әзір екендіктерін көрсетіп келеді. Адами қолдауды жылы сөзбен және іс-әрекетпен көрсетіп жүр. Айтар болсақ, еріктілер қиын шақтың дәл ортасында болғандарға, оның ішінде дәрігерлер мен бақылау-өткізу пункттеріндегі полиция қызметкерлеріне ыстық тамақ жеткізіп, жеміс себеттері және гүл шоқтарымен құрмет көрсеткен болатын. Компания неғұрлым зор көмек қажет болса, әр кез жауап беруге дайын. Былтырғы жылдан бастап Ақтөбе ферроқорытпа зауытынан Ақтөбе ауруханаларына оттегі баллондарын жіберуді жалғастырса, Хромтау қаласындағы «Евразия» медициналық орталығы үшін оттегі концентраторлары сатып алынды.

    Ал осы жылы медицина қызметкерлері күні қарсаңында «Қазхромның» үш филиалында «Біздің өмір – сіздің қолыңызда» атты символикалық акциясы өтті. Медицина қызметкерлерінің тәулік бойғы жұмыстарын жеңілдету, үйдегі жайлылықты сезіну және дәмді кофемен сергіту үшін қазхромдықтар медициналық қызметкерлердің демалыс бөлмелеріне кофе машиналарын, символикалық жазулары бар саптыаяқтар жиынтығын сыйға тартып, тәттілер үлестірді. Дәрігерлерге табысталған бағалы сыйлықтар олардың ыңғайлы жұмыс істеулері үшін арналған.

    – Сіздерді бүгінгі мерекеліріңізбен құттықтай отырып, қызметтіріңізге рақметімізді айтамыз. Ауданымызда халықтың денсаулығын қорғауда талмай еңбек етіп, алдағы уақытта да өздеріңізге жүктелген аса жауапты да қиын міндетті абыроймен атқарып, алғыс пен құрметке бөленіп жүре беріңіздер, — деп кәсіподақ комитеті төрайымының орынбасары Жарас Бесенов мереке иелерін құттықтады.

    Дөң тау-кен байыту комбинаты «Евразия» медициналық орталығынан бөлек, аудандық орталық аурухананың қызметкерлерін де құттықтады. Комбинаттың кәсіподақ комитеті атынан провизорлық орталыққа, жедел жәрдем бөлмесі мен бөлімшелер үшін бес диспенсер, ал санитарлық-эпидемиологиялық станцияға – қысқатолқынды пеш және дәрі-дәрмектерді сақтауға арналған шағын тоңазытқыш сыйға тартылды.

    Сондай-ақ, комбинаттың жастары мен еріктілері де мерекелік шарадан қалыс қалмай, кәсіподақ ұйымымен бірге құттықтап барды.

    Медицина қызметкерлерін құттықтау «Қазхромның» өзге де филилдарын да бір уақытта жүргізіліп, адам өмірін сақтауда аянбай еңбек ететін абзал жандардың мерекесін одан әрі нұрландыра түсті.

    Арайлым Ғани

    Алексей Пименовтың фотосуреттері

  • Үздік техникалық инспекторлар анықталды

    ERG құрамындағы «Қазхром»ТҰК» АҚ филиалы – Дөң тау-кен байыту комбинатында «Еңбекті қорғау бойынша үздік техникалық инспектор» байқауының бірінші тоқсан бойынша қорытындысы шықты. Сондай-ақ, 28 сәуір-Дүниезжүзілік еңбекті қорғау  күнінің айлығына қатысқан кәсіпорынның цехтары марапатталды.

    Техникалық инспектор – бұл Өзінің жеке уақытында учаскесіндегі техникалық қауіпсіздігіне көңіл бөлетін жауапты тұлғалар яғни, техникалық инспекторлардың Дөң тау-кен байыту комбинатындағы бүгінгі саны – 160. 

     Қауіпсіздің айлығына кәсіпорынның әр цехынан қатысқан қызметкерлер Дөң тау-кен байыту комбинатының үздік техникалық инспекторы атағына жеңіп алуға талпынғандар. Байқауда цехтарда жүргізілген тексерулер кезінде тек табылып қана қоймай, жойылған бұзуылулар дабыл парақтары мен ұсыныстар саны бағаланды. Сонымен қатар, әр қатысушыға «Техникалық инспектордың бір күні» бейнеролигін дайындауға тура келді.

    Жылдың бірінші тоқсаны бойынша үздік техникалық инспекторды комбинаттың кәсіподақ комитетінің төрайымы Раушан Бекмұханова мен Дөң тау-кен байыту комбинатының бас техникалық жетекшісі Самат Серғазин төрағалық етіп, анықтады.

    Сонымен, бұл тоқсанның бірінші орнын комбинаттың №1 ұсату және байыту фабрикасының ұсатушысы Құлтай Нұртазин еншіледі. Ал екінші орынды осы фабриканың кендерді кептірушісі Асылхан Урналин қанжығаласа, қоршаған ортаны қорғау зертханасының газ және шаңдарды талдау зертханашысы Айнагүл Ищанова жүлделі үшінші орынға тоқтады.

    – Әріптестерімізге техникалық қауіпсіздік айлығына белсенді қатысқандарыңыз үшін алғысымыз зор. Риза болып тұрмыз. Өндірістегі қауіпсіздік ұғымына асқан жауапкершілікпен қарайтын қызметкерлерді көре алдық. Еңбекті қорғау айлығын бізбен бірге қолдап, өзге де қызметкерлерге үлгі боларлық іс-әрекет көрсетудесіздер. Бұл әрі қарай да жалғасады деген сенімдеміз.Бұнымен тоқтап қалмай, қауіпсіз қызметті бірге жандандырайық, — деп кәсіпорынның жетекші техникалық инспекторы Тимур Ильжасов өз ойын білдірді. 

    Барлық жеңімпаздарға дипломдар мен ақшалай сыйлықтар табыс етілді.

    Сондай-ақ, кәсіподақ комитетінің төрайымы комбинаттың №1 ұсату және байыту фабрикасының бұл шараға көбірек қатысып, белсенді болғандарына ырза болды. Расымен де, фабрикалық әріптестер бір-бірінен оза шауып, маңызы зор айлықта биіктен көрінді.

    Марапаттау кезінде Дүниежүзілік еңбекті қорғау айлығына орай техникалық инспекторлар арасындағы ұйымдастырылған онлайн конкурс бойынша алдыңғы үштік анықталды:

    Бірінші орын – №3 жөндеу цехының электрслесарі Әбілхан Орынбаевқа бұйырды. Орталық зертхананың химиялық талдаулар зертханашысы Нұргүл Бикеева екінші орынды, ал техникалық бақылау орталығының кен өнімдерін байыту бақылаушысы Баянсұлу Сатаева үшінші орынды иеленді. Сонымен қоса, 16 техникалық инспектор қатысқандары үшін марапатталды.

    Бұл техникалық инспекторлардың барлығы онлайн байқауда өздерінің бейнеролик, шығармашылық жұмыстарымен өздеріне жүктелген маңызды міндетті көрсете білді. Ол әрине, еңбек қауіпсіздігін бақылау!

    Арайлым Ғани